Tuesday, July 28, 2009

కూరిమి గల దినములలో...

...


కూరిమి గల దినములలో
నేరములెన్నడును గలుగ నేరవు మరి యా
కూరిమి విరసంబైనప్పుడు
నేరములే దోచుచుండు నిక్కము సుమతీ!

అని సుమతీ శతకంలో ఎప్పుడో చెప్పారు. దీనిని బట్టి మనకు తెలియవచ్చింది ఏమిటయ్యా అంటే... మిత్రులు ఎల్లప్పుడూ కలిసి ఉన్ననూ ఎప్పుడో ఒకప్పుడు వారి మధ్య బేదాభిప్రాయములు రాక మానవు. అది కూడా చాలా విధాలుగా మంచిది అనుకోండి. అలా రాకపోతే అది స్నేహమే కాదేమో అని నా అభిప్రాయం. ఎందుకంటే, లోకంలో ఏ ఇద్దరు మనుష్యులూ, వారి మనస్తత్వాలూ ఒకేలా ఉండవు. అలాంటప్పుడు బేదాభిప్రాయాలు రాలేదు అంటే ఏమిటి అర్ధం? ఇద్దరిలో ఒక్కరే ఎప్పుడూ సర్దుకుపోతున్నారని. అటువంటి స్నేహం హర్షింపతగ్గదా చెప్పండి? ఇంకా అస్సలు విషయానికి వస్తే... మొన్నీమధ్య పై పద్యం విన్నప్పుడు నాకొక మెరుపులాంటి ఆలోచన వచ్చింది.
మిత్రులు ఎప్పుడూ సర్దుకు పోతూ ఉంటారు. ఏదైనా మనస్పర్దలు వచ్చినప్పుడు "నువ్వప్పుడు అది చేసావ్, నువ్విప్పుడు ఇది చేసావ్" అంటూ గొడవ మొదలు పెడతారు. నేనంటానూ... అదేదో ఇప్పుడే ఒక మంచి సమయం చూసి (ఏమీ తోచనప్పుడు) ఈ విషయాలు చర్చించుకోవాలి... (ముఖ్యంగా రూంమేట్స్)
౧. ఎదుటి వారిలో మీకు ఏమి నచ్చలేదు.
౨. ఎదుటి వారిలో మీకు ఏమి నచ్చింది.
౩. మీకు మీరు ఏమి మెరుగుపర్చుకుందాం అని అనుకుంటున్నారు
౪. మున్ముందు సమస్యలను ఎలా పరిష్కారం చేసుకుంటే బాగుంటుంది...
దీని వలన చాలా ఉపయోగాలు ఉన్నాయి. మిత్రులు ఒకరినొకరు బాగా అర్ధం చేసుకోవచ్చు. రాబోయే సమస్యలని ముందుగానే పసిగట్టొచ్చు. మీరే ఆలోచించండి.

(అప్పుడెప్పుడో ఇంకా చాలా అనుకున్నాను కానీ, ఈ టపా రాయటంలో కాలయాపన జరగటం వలన ఇప్పుడు అవన్ని మర్చిపోయాను. కాబట్టి "ఇంతే సంగతులు, చిత్తగించవలెను!")

No comments: